અમદાવાદ-મુંબઇ બુલેટ ટ્રેન માટે NRIએ જમીન આપી

  • અમદાવાદ-મુંબઇ બુલેટ ટ્રેન  માટે NRIએ જમીન આપી
    અમદાવાદ-મુંબઇ બુલેટ ટ્રેન માટે NRIએ જમીન આપી

અમદાવાદ તા.1
પાદરા તાલુકાના ચાણસદનાં વતની અનેન જર્મનીમાં સ્થાયી થયેલાં વૃદ્ધાએ ખાસ વડોદરા આવી બુલેટ ટ્રેન પ્રોજેક્ટને જમીન સુપરત કરી હતી. એક બાજુ જમીન નહીં આપવા અને બુલેટ ટ્રેનનો વિરોધ કરવા જાપાન જવાની કેટલાક ખેડૂતો તૈયારી કરી રહ્યા છે ત્યારે જર્મનીથી ખાસ જમીન આપવા માટે અત્રે આવેલાં સવિતાબહેન પટેલે આગવું ઉદાહરણ પૂરું પાડ્યું છે.
અમદાવાદ -મુંબઇ હાઇસ્પીડ ટ્રેન પ્રોજેક્ટ હેન્ડલ કરી રહેલા નેશનલ હાઇસ્પીડ રેલ કોર્પોરેશન લિમિટેડ દ્વારા જમીન સંપાદન કરવાની પ્રક્રિયા શરૂ કરવામાં આવી છે. જે અંગે વડોદરા જિલ્લામાં પહેલું વળતર ચાણસદનાં સવિતાબહેનને ચૂકવાયું છે. કુલ 8.44 કરોડની કિંમતની 1.57 હેકટર જમીન માટે આ કાર્યવાહી શરૂ થઇ છે. ચાણસદનાં સવિતાબહેન ધો.10 પાસ છે.
સવિતાબેન પાસે ચાણસદમાં પૈતૃક 71 એકર જમીન છે જેમાંથી તેઓએ 11.94 એકર જમીન આપી છે. તેઓ 33 વર્ષ અગાઉ જર્મની સ્થાયી થયાં હતાં. તેમના પતિ સરકારી દવાખાનામાંથી નિવૃત્ત થયા હતા. જેમનું તાજેતરમાં નિધન થયું હતું. જર્મનીમાં હોટલ ધરાવતા પુત્ર સાથે તેઓ રહે છે. બુલેટ ટ્રેન પ્રોજેક્ટ દ્વારા તેમની જમીનનું રૂ. 30234 વળતર ચૂકવવામાં આવ્યું છે.
નેશનલ હાઈસ્પીડ રેલ કોર્પોરેશન લિમિટેડના પ્રવક્તા ધનંજય કુમારે કહ્યું કે નસવિતાબેને બુલેટ ટ્રેન પ્રોજેક્ટ માટે જમીન આપી છે તેઓ ભારત આવ્યાં હતાં, હાલ જર્મની પાછા પહોંચી ગયા છે.
રાજયમાં પ્રોજેક્ટ માટે જમીન સંપાદન કરવાનો આ પ્રથમ
ઘટનાક્રમ છે તેવી નોંધ લેતા એનએચએસઆરસીએલના પ્રવક્તા ધનંજય કુમારે જણાવ્યું કે, 508 કિલોમીટરના આ કોરીડોર માટે કુલ 1,400 હેક્ટર જમીન સંપાદન કરવાની રહેશે. તે પૈકી 1,120 હેક્ટર જમીન ખાનગી માલિકીની છે. આ માટે 6000 જેટલા જમીન માલીકોને વળતર ચૂકવવાનું રહેશે.