ચૂંટણીપંચનો સુઓમોટો, કલેક્ટર પાસે ‘હલકટ’નો રિપોર્ટ મગાયો

  • ચૂંટણીપંચનો સુઓમોટો, કલેક્ટર પાસે ‘હલકટ’નો રિપોર્ટ મગાયો

રાજકોટ તા,17
લોકસભા ચૂંટણીમાં મત માટે ભાજપ - કોંગ્રેસના નેતાઓ મરણિયા બન્યા છે. મત માટે અભદ્ર વાણી વિલાસ કરવામાં જાણે ‘રેસ’ લાગી હોય તેવા નિવેદન કરવામાં આવ્યા છે. તેની સામે ચૂંટણીપંચ લાલધૂમ થયું છે. રાજકોટ લોકસભા બેઠકના કોંગ્રેસના ઉમેદવાર લલીત કગથરાએ ભાજપને હલકટના પેટના કહેતા ચૂંટણીપંચે આ મામલે સુઓમોટો કરી રાજકોટ કલેકટર પાસે રિપોર્ટ માગ્યો હતો.
કોટડાસાંગાણી પંથકમાં પ્રચારમાં ગયેલ કોંગ્રેસના ઉમેદવાર લલીત કગથરાએ જણાવ્યું હતું કે ખેતી - ગામડા માટે ભાજપ નથી ભાજપ આપણો છે જ નહીં તેને કોઈની ચિંતા નથી તેને ખેતીની ચિતા નથી તમારા કોઈની ચિંતા નથી માત્ર ઉદ્યોગોની વાત કરે છે. એટલે કાઠિયાવાડી ભાષામાં કહીએ તો હલકટના પેટના છે, ખોટીના છે, માત્ર ફાફા મારવા છે કંઈ કરવું નથી. કોંગે્રસના લલીત કગથરાના વિવાદી નિવેદન અંગે ચૂંટણીપંચે કોઈપણ જાતની ફરિયાદ વગર સિધો જ કલેકટર પાસે રિપોર્ટ મંગાવ્યો હતો. કલેકટરે આ માટે રાજકોટ ગ્રામ્ય પ્રાંત અધિકારીને તપાસ સોંપી હતી. રાજકોટ ગ્રામ્યના આસી. કલેકટર ડો.એમ પ્રકાશે કોંગ્રસના લલીત કગથરાનુ નિવેદન લીધુ હતું. કગથરાએ જણાવ્યું હતું કે હલકટના પેટના કોઈ ગાળ નથી. તળપદી ભાષા છે. આમ આ રિપોર્ટ તેઓએ કલેકટરને કરી દિધો હતો અને કલેકટરે ચૂંટણીમંચને રિપોર્ટ કરી દિધો છે. લોકસભા ચૂંટણીમાં ગુજરાતમાં સીધી જ ચૂંટણીપંચે સુઓમોટો કર્યો હોય તેવો આ પ્રથમ બનાવ છે.
આ ઉપરાંત રાજકોટ તાલુકાના લોઠડા ગામે ગઈકાલે શક્તિ માતાજીનો નવરંગ માંડવો હતો. આ દરમિયાન મોહન કુંડારિયા લોકસભાના ભાજપના ઉમેદવાર, ધારાસભ્ય અરવિંદ રૈયાણી સહિત ભાજપના નેતાઓ પ્રચારમાં ગયા હતા ત્યારે માતાજીના માંડવામાં ધારાસભ્ય અરવિંદ રૈયાણી, ભાજપના નેતા બાબુ નસીત ધૂણ્યા હતા અને સાકળ મારી હતી.
આ ઘટના અંગે પણ ચૂંટણી પંચે તપાસનો આદેશ આપ્યો છે તેથી કલેકટર દ્વારા તપાસનો ધમધમાટ શરુ કરવામાં આવ્યો છે. લોકસભા ચૂંટણીમાં કડક આચારસંહિતાના નેતાઓ દ્વારા કરવામાં આવતા બેફામ વાણી વિલાસ સામે તપાસ શરુ કરવામાં આવતા રાજકીયપક્ષોમાં ખળભળાટ મચી જવા પામ્યો છે.