સોમનાથ સાન્નિધ્યે બ્રહ્મ સમાજનું બે દિવસીય અધિવેશન યોજાયું

  • સોમનાથ સાન્નિધ્યે બ્રહ્મ સમાજનું બે દિવસીય અધિવેશન યોજાયું
    સોમનાથ સાન્નિધ્યે બ્રહ્મ સમાજનું બે દિવસીય અધિવેશન યોજાયું

સોમનાથ મહાદેવના સાન્નિધ્યે સૌરાષ્ટ્ર કચ્છ સમસ્ત બ્રહ્મ સમાજ નું 25 મું બે દિવસીય મહા અધિવેશન યોજાયું હતું. ગિર-સોમનાથ સમસ્ત બ્રહ્મ સમાજના યજમાનપદે આયોજીત આ અધિવેશનમાં તા. 13 અને 14 એપ્રિલે સોમનાથ ખાતે મોટી સંખ્યામાં ભૂદેવો મહા અધિવેશનમાં ઉમટી પડ્યા હતા. જેમાં તા. 13 એપ્રિલે રોજ યુવાનો દ્વારા બાઈક રેલી, સોમનાથ મહાદેવ, પરશુરામ ભગવાન અને નૂતન રામ મંદિરમાં ધ્વજારોહણ કરવામાં આવ્યું હતું. ત્યારબાદ સાંજે સૌરાષ્ટ્ર-કચ્છના વિખ્યાત ભૂદેવ કલાકારોએ સંતવાણીમાં સહુને રસતરબોળ કરી દીધા હતા. 14 એપ્રિલે ક્રાંતિકારી સંત અને અખિલ ભારતીય સાધુ સમાજના પ્રમુખ મુક્તાનંદબાપુ સહિતના સમાજ શ્રેષ્ઠીઓની ઉપસ્થિતિમાં સૌરાષ્ટ્ર-કચ્છ સમસ્ત બ્રહ્મ સમાજના બંધારણની જોગવાઈ મુજબ સર્વાનુમતે ઠરાવ પસાર કરી અને સૌરાષ્ટ્ર કચ્છ સમસ્ત બ્રહ્મ સમાજના પ્રમુખ પદે છેલભાઈ જોશીની વરણી કરવામાં આવી હતી. બાદમાં તેમણે પોતાની ટીમની પણ જાહેરાત કરી હતી. જેમાં સંજયભાઇ જોષી-મહામંત્રી, દેવેનભાઇ ઓઝા-ખજાનચી, મનુભાઇ પંડ્યા-સંગઠન મંત્રી, યુવા પાંખના પ્રમુખ પદે હિતેષભાઇ ઓઝા અને મહામંત્રી પદે હેમલભાઇ ભટ્ટ તેમજ ગિર-સોમનાથ જિલ્લા પ્રમુખ તરીકે મિલનભાઇ જોષીની નિમણૂંક કરી હતી. મહા અધિવેશનના પ્રમુખ સ્થાનેથી મુક્તાનંદબાપુએ સમાજને સંગઠિત થવા અને જાગૃત થવા હાકલ કરી હતી. વર્તમાન પરિસ્થિતિને ધ્યાનમાં લઈ જો સમાજ સંગઠિત થશે તો સામાજિક કે રાજકીય ક્ષેત્રમાં ભૂદેવોને આગળ આવવામાં કોઈ રોકી નહીં શકે. એમ તેમણે જણાવ્યું હતું.