કુતિયાણાના ધારાસભ્યએ હોટલ માલિકને આપી ધમકી


એક ડઝન શખ્સો સામે રાયોટીંગનો ગુનો નોંધાયો
પોરબંદર તા.11
પોરબંદરમાં ધારાસભ્ય કાંધલ જાડેજાએ હોટેલ માલીકને રૂબરૂ મળી ખૂનની ધમકી આપી હોવાની પોલીસ ફરિયાદ નોંધાઈ છે.
પોરબંદરના કડીયાપ્લોટમાં રહેતા અને એચ.એમ.પી. કોલોની સામે કાવેરી હોટેલ ધરાવતા અને કેબલના વ્યવસાય સાથે સંકળાયેલા લીલાભાઈ ટપુભાઈ ઓડેદરા નામના આધેડે એવી પોલીસ ફરિયાદ નોંધાવી છે કે દિવાળીની સાંજે તેઓ પોતાની હોટેલ સામે રેલ્વે ટ્રેક પાસે બેઠા હતા. ત્યારે રાણાવાવ-કુતિયાણાના ધારાસભ્ય કાંધલ જાડેજા, રામ ખુંટી, એક સીદી બાદશાહ, એક ચાંદલો કરેલો અજાણ્યો શખ્સ ઉપરાંત અન્ય 8 થી 10 માણસો ગેરકાયદેસર મંડળી રચી ધસી આવ્યા હતા અને લીલાભાઈને ગાળો દઈ, જાનથી મારી નાખવાની ધમકી આપી હતી. દિવાળીની સાંજે બનેલા આ બનાવમાં પોલીસે આરોપીઓની ધરપકડની તજવીજ હાથ ધરી છે.
પીધેલ પકડાયો
પોરબંદરના રતનપુર ગામનો યુવાન રાણાવાવ પોલીસ સ્ટેશનના મેદાનમાંથી પીધેલો પકડાયો હતો.રતનપર ગામનો ખીમાણંદ પુંજાભાઈ ઓડેદરા નામનો ટ્રક ડ્રાયવીંગના ધંધા સાથે સંકળાયેલ યુવાન 20 હજારનું સ્પ્લેન્ડર બાઈક લઈને પીધેલી હાલતમાં રાણાવાવ પોલીસ સ્ટેશનના મેદાનમાંથી મળી આવતા પોલીસે તેની ધરપકડ કરી હતી.