જેટ એરવેઝ પણ કિંગ ફિશરની જેમ ઉડી જશે ?

  • જેટ એરવેઝ પણ કિંગ  ફિશરની જેમ ઉડી જશે ?
    જેટ એરવેઝ પણ કિંગ ફિશરની જેમ ઉડી જશે ?

નવી દિલ્હી તા.3
જેટ એરવેઝે કર્મચારીઓને જણાવ્યું છે કે, પગારમાં ઘટાડા સહિત ખર્ચકાપનાં પગલાં નહીં લેવાય તો એરલાઇન 60 દિવસથી વધુ ચાલી નહીં શકે. જેટ એરવેઝના બે એક્ઝિક્યુટિવ્સે જણાવ્યું હતું કે, ચેરમેન નરેશ ગોયલ સહિત મેનેજમેન્ટ ટીમે કર્મચારીઓને કંપનીની નાણાકીય સ્થિતિ ખરાબ હોવાની માહિતી આપી છે અને ખર્ચ ઘટાડવા માટે તાત્કાલિક પગલાંની જરૂરિયાત જણાવી છે.
જેટ એરવેઝના એક સિનિયર એક્ઝિક્યુટિવે જણાવ્યું હતું કે, અમને જણાવાયું છે કે, એરલાઇન બે મહિનાથી વધુ ચાલી શકે તેમ નથી. મેનેજમેન્ટે પગારકાપ દ્વારા ખર્ચકાપનાં પગલાં લેવાં જરૂરી છે. અમને ચિંતા છે કે, એરલાઇને અમને આટલાં વર્ષો સુધી નાણાકીય બાબતોની માહિતી આપી ન હતી. તેને લીધે મેનેજમેન્ટમાં કર્મચારીઓનો વિશ્વાસ ઘટ્યો છે.
એરલાઇનના એક્ઝિક્યુટિવ્સે જણાવ્યું હતું કે, એરલાઇને જુદાજુદા વિભાગના લોકોની છટણી શરૂ કરી છે. એન્જિનિયરિંગ વિભાગના કર્મચારીઓને આ બાબતે નિર્દેશ આપી દેવાયો છે. બે એક્ઝિક્યુટિવ્સે જણાવ્યું હતું કે, એન્જિનિયરિંગ વિભાગમાં દિલ્હી માટેના હેડ ઓફ લાઇનને પાણીચુ પકડાવી દેવાયું છે. ઉપરાંત, કેબિન ક્રૂ અને ગ્રાઉન્ડ હેન્ડલિંગ સેગમેન્ટમાં કામ કરતા કર્મચારીઓની નોકરી પણ જોખમમાં છે.
એરલાઇને કર્મચારીઓને પગારમાં 25 ટકા સુધીનો ઘટાડો કરવાની ચેતવણી આપી છે. પગલાથી એરલાઇનને વાર્ષિક છ500 કરોડની બચત થશે. ગોયલની આગેવાનીમાં એરલાઇનની મેનેજમેન્ટ ટીમ મુંબઈમાં કર્મચારીઓને મળી હતી અને જણાવ્યું હતું કે, પગારકાપ 24 મહિના માટે છે અને જે પગાર કપાશે તેનું રિફંડ નહીં મળે.
મેનેજમેન્ટે ગુરુવારે દિલ્હીના કર્મચારીઓ સાથે પણ મુલાકાત કરી હતી. મેનેજમેન્ટે એરલાઇનની નાણાકીય સ્થિતિ માટે ઈંધણના વધતા ભાવ અને ઇન્ડિગો દ્વારા મોટો બજારહિસ્સો ખેંચી લેવાનાં કારણો આપ્યાં હતાં.
એરલાઇને ફર્સ્ટ ઓફિસર્સને સાત વર્ષના બોન્ડ અથવા છ1 કરોડની શરતમાંથી મુક્તિ આપી છે. ઉપરાંત, કમાન્ડર્સ સહિતના પાઇલટ્સ માટે એક વર્ષનો ફરજિયાત નોટિસ પિરિયડ પણ દૂર કર્યો છે. નાણાકીય વર્ષ 2016 અને 2017માં સતત બે વર્ષ સુધી નફો કર્યા પછી એરલાઇને 2017-18માં લગભગ છ767 કરોડની ખોટ કરી હતી. જોકે, જેટ સિવાય અન્ય એરલાઇન્સના નફામાં પણ ઘટાડો થયો છે.
પેસેન્જર્સની રીતે ભારતની સૌથી મોટી એરલાઇન ઇન્ડિગોએ સોમવારે પરિણામ જાહેર કર્યું હતું. પ્રથમ ક્વાર્ટરમાં કંપનીના નફામાં 91 ટકા ઘટાડો નોંધાયો છે. વિશ્લેષકોના જણાવ્યા અનુસાર જેટ એરવેઝ ચાલુ નાણાકીય વર્ષના પ્રથમ ક્વાર્ટરમાં છ1,000 કરોડની ખોટ કરે તેવી શક્યતા છે. અગાઉના વર્ષના સમાન ગાળામાં એરલાઇને છ53.50 કરોડનો નફો કર્યો હતો.